من وقت لوقت بحب هيك طلطل ع رفقاتي،
سلم عليهن، نشرب سوا فنجان قهوة و نداون شوي، حتى نضل ع اتصال و ما تنقطع اخبارنا
عن بعض.
بس ما عطول بتوفق بزياراتي و ايام
بترجع سلتي فاضية وايام انا ما برجع، و متل ما صابيع ايديك منهن متل بعضن
كمان الناس منها متل بعضا.
في ناس منهن دايما" الركوة عندن
جاهزة ع النار، و ما بيخلوني فل قبل ما نتغدا و نشرب ركوة تانية و نبصر بالفنجان
كمان.
هول الناس بالعادة الحديث معن ب ريح
النفس اكتر من غيرن، بحس حالي آخد راحتي و ما في رسميات و واجبات بيناتنا،
بيفهموني ع الطاير، منحكي كتير و منشق ع بعضنا كتير، و عطول بيزوروني هني و
بيسألوا عني، و اذا شي مرة طولت أو كنت مشغول، ما بلاقيهن الا عندي و بيضلوا
ناطرين لخلص شغلي، ليطمنوا عليي، هول الناس ما في منهن ابدا".
و في ناس بس زورهن، الركوة بتطول
لتركب ع النار او يمكن ما تركب.
بالعادة الحديث معهن بيكون عادي،
يتخلله بعض المزح و النكات. هول الناس كل يوم بمزاج، مرة معك و مرة ضدك، مرة بيحكوا معك
و مرة بيحكوا عليك، متل العشب الطري، بياخدو الريح متل ما بدو، هني هيك، بيصدقوا
كل كلمة بيسمعوها، و بيقتنعوا بكل رأي بيسمعوا، و بيمشوا متل ما غيرهن بيمشيهن، ما
بتشوف وجهن الا بعد ما انت تزورهن، وحدة بوحدة، بيجمعوا كومة اخبار و بيجوا يحكوا،
و انا بسمع من هون و بنسى من هون، بفوت بدينتي اليمين و بطلع من دينتي الشمال، و
ما بخلي ولا حرف يعلق جوا. و أنا بعد الخبرة، صرت شق عليهن ع الخفيف، لا بوجع راسي
بحكي الغرب و لا بوجع قلبي باخبار القرب، خليني محتفظ بهل الصورة الحلوة عنهن و ما
بدي اكتر من هيك.
و في ناس ما عندن قهوة بالمرة !!
كل ما بجي لعندن بحس حالي غريب و جايي
بزيارة تعارف. و الحديث معهن بيكون كتير رسمي، كلمة و رد غطاها، و ايام كتير بيكون
الحديث ع الباب، سلام و وداع . مع انو كنا بالماضي نحكي مع بعض اكتر من هيك، بس
مدري ليش هيك تغيروا، و هلأ بطلت شوف وجهن الا بالمناسبات و بالعيد و من بعيد
لبعيد، او وقت انا زورهن بين العيدين.
و في ناس بتطبق عليهن غنية فيروز :
" دقيت دقيت و ايديي تجرحوا،
قنديلكن سهران ليش ما بتفتحوا "
هول الناس بحب من وقت للتاني اجي و طل
عليهن، بركي صايرلهن شي ... بحس انو هيدا واجبي اسأل عنهن حتى لو ما فتحوا الباب،
بخاف عليهن، ﻷن بعرف انو، لا سمح الله، بكرا اذا صار شي ما الهن غيري انا يوقف
حدهن ...
و في ناس ما فيني احكي عنهن لأن
شهادتي فيهن مجروحا، عطول مخيم عندن أو هني مخيمين عندي،
هول الناس بحسهن متل خيي التوأم أو
حتى متلي أنا... ما بينعدوا ع صابيع الإيد الوحدة ، ﻷنهن أقل، هول من الاشيا
النادرة بهل كون، الله ما خلق غيرهن، special
edition، اللي بصيرلي
بصيرلهن،
هني اللي بيعرفوا كل تفاصيل حياتي بلا
ما خبرهن،
هني اللي بيعرفوا احتياجاتي بلا ما
اسألهن،
هني اللي بيتحملوا مشاكلي و ثوراتي،
هني الوحيدين اللي بيعرفوا ينصحوني،
و يللي نصيحتن بتصيب بالقلب و بتضرب ع
الدماغ و بتخليك حاسس حالك مسلطن، متل كأنك اكتشفت شي كنز مدفون، و هول الناس اللي
فيني اتكل عليهن بكتير اشيا، و هني اللي بيمونوا عليي و ع الرقبة و ع الدمات، و
مطرحهن بالقلب محفور، و ما حدا بعبي مطرحهن، و في الهن حصة بكلشي.
و هول اللي بيسموهن الفلاسفة
"اخوة الروح" بس انا بسميهن "انا المش انا".
و متل ما كل قفل الو مفتاح
واحد و وحيد، هيك الناس و الرفقة، انت هوي القفل، و حولك ملايين المفاتيح، بس ما
في الا مفتاح واحد بيظبط عليك، يمكن يكون في كذا نسخة، بس بالنهاية هني مفتاح واحد.
----------
جميل الحداد
